Молитвы священномученику Се́ргию
Тропарь, глас 4:
От ко́рене пра́веднаго прозя́бл еси́, / правосла́вия наста́вниче и ревни́телю, / пред Бо́гом во у́зах и до сме́рти предстоя́, / гла́сом немо́лчным па́ству наставля́л еси́, / священному́чениче Се́ргие, / моли́ Христа́ Бо́га // спасти́ся душа́м на́шим.
Кондак, глас 8:
Вели́кою любо́вию к та́йне богослуже́ния прилежа́л еси́, / па́ству свою́ призыва́я после́довати житию́ святы́х отце́в / и познава́ти писа́ния их свои́ми дея́ньми; / за Христа́ страда́ния во у́зах и смерть прия́л еси́; // те́мже взыва́ем ти: Ра́дуйся, Се́ргие священному́чениче.
Молитва священномученику Сергию, пресвитеру Московскому
О преслáвный священномỳчениче Сéргие, плáменный молѝтвенниче, стóлпе Правослáвия, пáстырю Богомỳдре и исповéдниче, за Христá страдáния и смерть прия́вый!
Вéруем, яко покровѝтелем нáшим вкỳпе с прáведным стáрцем Алексѝем прѝсно пребывáеши и попечéний о пáстве и ныне не оставляеши. Сегó рáди мóлим тя: прострѝ рỳку пóмощи всем в нéмощи и скóрби сỳщим; научѝ во единодỳшии и любвé пребывáти, и вéчности, в тáйне богослужéния являемей, óбщники ны сотворѝ. Вéру правослáвную исповéдати, глáсу сóвести слéдовати и по Бóзе деяньми жѝти помозѝ; да тобóю укрепляеми, к гóрнему устремѝмся и Цáрствия Небéсного достѝгнем, идéже ты в сóнме новомỳченик и исповéдник Россѝйских непрестáнно слáвиши Всеблагáго во Святéй Трóице Едѝнаго Бóга во вéки. Амѝнь.
Тропарь и кондак святым праведному Алекси́ю и священномученику Се́ргию
Тропарь, глас 8:
Святу́ю дво́ицу днесь восхва́лим, ве́рнии, / пра́веднаго Алекси́я и священному́ченика Се́ргия; / сии́ бо в ли́це святы́х земли́ Ру́сския просия́вшия, // непреста́нно мо́лят спасти́ся душа́м на́шим.
Кондак, глас 8:
Любо́вию Христо́вою испо́лненнии, / и то́ю мно́гия на спаси́тельныя стези́ наста́вившии, / пра́ведне Алекси́е и священному́чениче Се́ргие, / предстоя́ще ны́не в со́нме святы́х земли́ Ру́сския Престо́лу Святы́я Тро́ицы, // моли́те за ны Всеми́лостиваго Бо́га.
Молитва святым праведному Алекси́ю и священномученику Се́ргию
О всечестни́и и пресла́внии па́стырие наша, пра́ведный Алекси́е, ста́рче Московский, и священному́чениче Се́ргие! Ве́мы, яко днесь вкупе с новому́ченики и испове́дники Российскими и всеми святыми во Свете незаходи́мем пребыва́юще, молитвы ваша ко Христу, Солнцу правды, о оте́честве нашем и лю́дех простира́ете. Вы бо есте ко́рмчии, мудро корабль спасения упра́вившии, свети́льницы, светом Христо́вым просия́вшии, испове́дницы, чистоту Православия веры сохра́ншии.
Светоно́сне ста́рче Алекси́е, ко́реню добрый, сына – прее́мника трудов твоих и испове́дника произрасти́вший, ми́лующим сердцем и те́плою к Богу моли́твою душе́вныя и теле́сныя неду́ги врачу́ющий, любо́вию и смире́нием вражду и неприязнь побежда́ти науча́ющий. Ты бо завещал еси преда́ти себе в ру́це Бо́жии и исполня́ти святу́ю волю Его; жи́ти скорбьми́ и ра́достьми бли́жних, люби́ти я па́че себе. И ны́не, о́тче святы́й, не преста́й моли́ти Владыку о укрепле́нии воли на́шея к доброде́ланию, помози́ и ближним нашим в бедах и ско́рбех су́щим, укрепи решимость до конца после́довати Христу.
И ты, священному́чениче Се́ргие, свя́тости оте́ческия насле́дниче, ве́ру православную во страда́ниях и до смерти испове́давше, богосло́вия и́стиннаго де́йственный побо́рник и учитель яви́лся еси́. Темже дерзнове́ние ко Го́споду име́я, моли́ и нам пода́ти крепость во испыта́ниях, разуме́ти прему́дрость ве́лию писа́ний святооте́ческих и Боже́ственныя службы преми́рность.
К вам, о чадолюби́вии предста́тели и засту́пницы на́ша, со умиле́нием припа́даем и, велича́я труды́ и боле́зни ваша, мо́лим: при́зрите на ны, уныва́ющия, немощны́я и всеси́льными моли́твами ва́шими вся зла́я от нас отврати́те; научи́те подража́ти ве́ре, терпению и любве́ ва́шея; испроси́те, о всеблаже́ннии, у Всеще́драго Бога благода́ти во еже умягчи́ти окамене́вшая сердца́ на́ша, да со упова́нием непрело́жным на ми́лость Его тече́м на предлежа́щий по́двиг спасе́ния души́, и да сподо́бимся унасле́довати Ца́рствие Небе́сное и та́мо вку́пе с вами в ра́дости безконе́чней воспева́ти в Тро́ице сла́вимаго Бо́га во веки веков. Аминь.
